Ongi etorri beroa egin diete espetxetik berriki ateratako gazte getxoztarrei Igorlea: UKBERRI.NET - Data: Astelehena, 2009 Aza, 16 - 06:26 PM
Joan den larunbatean, azaroak 14, 300 lagun inguru batu ziren Algortako Bihotz-Alai plazan, Uribe Kostako Amnistiaren Aldeko Mugimenduak emandako zenbakiaren arabera, espetxetik berriki ateratako Joseba Elorriaga, Aner Mimenza eta Lander Labajo gazteei eskainitako ongi etorri ekitaldian (mp3). Txalaparta, bertso, aurresku eta lore sorta artean, AAMko kide batek (mp3) "errepresioaren egoera" aztertu eta "mahai gainean elementu berria" daukagula azpimarratu zuen: ezker abertzaleak mahai gainean jarri duen proposamena, alegia. Horren helburua "presoak kaleratzea eta konponbide demokratikoa lortzea" dela aipatu zuen errepresioaren kontrako mugimenduko bozeramaileak. Eta, beraz, "bat egiten duela Amnistiaren Aldeko Mugimenduaren helburuak lortzeko". Gauzak horrela, jendea animatu zuen, batetik, proposamen horren eztabaidan parte hartu eta hori bultzatzeko; eta bestetik AMMren egituretan antolatzeko, "konponbide demokratikoak aurrera egingo badu amnistiaren aldeko mugimendu zabal eta sendoa behar izango delako". Argazkian, ezkerretik eskuinera, Mimenza, Elorriaga eta Labajo agertoki gainean, batak besteari "askatasunaren giltza" ematen. Argazki gehiago ikusteko sakatu hemen.
Txalaparta soinuek eman zioten hasiera larunbateko ongi etorri ekitaldiari. Horren ostean, ekitaldiko aurkezlea Joseba Elorriaga, Aner Mimenza eta Lander Labajok bizi izandakoak eta horren ingurukoak azaldu zituen herriko presoak aurkeztu aurretik, jendearen txaloen artean, haien argazkiak zeramatzaten pertsonak eszenatokiaren aurrean kokatzen zihoazen bitartean. Txapela jantzi zieten omendutakoei, loreak eman zizkieten eta ohorezko dantzak egin. Kalera ateratako azken presoak zurezko giltza pasatu zion Elorriagari, horrek Mimenzari eman eta azkenean Labajoren eskuetan amaitu zuen, Algortako tradizioari jarraituz, kaleratutako azken presoak giltza gordetzen baitu hurrengoari "atea zabaltzeko". Orduan megafoniatik preso batek grabatutako mezua jarri zuten entzuteko. Lau bertsolarik bertso bana eskaini zizkieten (Etengabek zabaldutako bideoa ikusi).
Gero kanta bat, herriko abeslari baten eskutik; Lander animatu eta harekin batera kantatu zuen abestia. Ondoren etorri ziren Amnistiaren Aldeko Mugimenduko kidearen hitzak. Horren ostean, espetxetik berriki irtendako hiru gazteek hitz egin zuten (Etengabek zabaldutako bideoa ikusi).
Eta amaitzeko, "Eusko Gudariak" abestu aurretik, omendutako hirurek "Txikia" abestia kantatu zuten, atxiloketa egunetan, "ziegetako egunetan hori abestuta hartu zuten indar eta kemena gogoratzeko". Ekitaldia amaituta, manifestazioa egin zen Algortako kaleetan barrena. Bazkaltzeko orduan herri bazkaria egin zen, giro ezinonean: bazkari bikaina, giro kementsua, trikitia, opariak, hitzaldiak "preso guztiak kaleratu eta askatasuna lortzeko gogo bizian", AAMk azaldu duenez.
