|
|
 |
Tesia iaz irakurri zuten 300 doktoreak omenduko ditu EHUk
Igorlea: UKBERRI.NET - Data: Osteguna, 2012 Mai, 17 - 08:46 PM
51 Irakurketa
Bihar, ostirala, maiatzak 18, Euskal Herriko Unibertsitateak 2011n tesia irakurri duten 306 doktore berriei omenaldia egingo die. Doktoreak izendatzeko ekitaldia arratsaldeko 6etan burutuko dute Leioa eta Erandioko campuseko Areto Nagusian. Doktore berrietatik, 162 emakumeak dira eta 144 gizonezkoak. Bederatzi tesi Latinoamerikan irakurri dira. 306 tesietatik 37 euskaraz aurkeztu zituzten, hau da, %12,09a, 2010ean baino bost puntu gehiago. Halaber, ekimenaren zehar, 2008-09ko doktoregoko 29 sari bereziak emango dira. Ekitaldi horrekin EHUk "doktoreak prestatzearen eta arlo akademikoan zein profesionalean titulu hau eskuratzearen garrantzia" erakutsi nahi dio jendarteari. Zeremonia Iñaki Goirizelaia errektoreak gidatuko du eta Jean Louis Gout Paue eta Aturri-Lurraldeetako Unibertsitateko lehendakariak "Un nuevo marco de colaboracion transfronterizo en la formacion" hitzaldia irakurriko du. Argazkian, diploma banaketa ekitaldi bat / © EHU.
|
|
Gizon bat atxilotu dute Leioan txalet batean lapurtu duelakoan
Igorlea: UKBERRI.NET - Data: Osteguna, 2012 Mai, 17 - 07:09 PM
93 Irakurketa
Ertzaintzak 42 urteko gizonezko bat atxilotu du gaur goizaldean Artatzan, Leioako txalet batean lapurtzen saiatu delakoan. Izan ere, goizeko 5etan, udalerriko etxe batean segurtasun alarma jo du eta horren berri izan dute bai Ertzaintzak eta baita Leioako Udaltzaingoak ere. Bi polizi erakundeak bertaratu eta lapurraren bilaketari ekin diote inguruetan. Minutu batzuk beranduago, gizonezko bat topatu dute Artatzako jauregiko parkean, poliziak ikusita moztutako zuhaitz baten enborraren atzean ezkutatzen saiatu dena, Herrizaingo Sailaren arabera. Susmagarria identifikatu ostean, arakatzean, bihurkin bat, artazi batzuk eta emakume belarritakoak topatu dizkiote soinean. Belarritakoak txaleten egindako lapurretaren parte izan zitezkeelakoan ertzainek jabeei erakutsi dizkie bitxiak eta horiek baieztatu dute sendiaren kide batenak direla. Ertzaintzak zabaldu duenez, atxilotuak aurrekari franko du jabegoaren aurkako delituengatik.
|
|
Eusko Alkartasuna, Alternatiba, Aralar eta Ezker Abertzalea: "Justizia egingo bada, absoluzioa izango da epai posible bakarra"
Igorlea: UKBERRI.NET - Data: Osteguna, 2012 Mai, 17 - 06:30 PM
49 Irakurketa
Epaiketa hasi baino lehen esaten genuena berretsi egin da: euskal jendarteari hauteskundeetarako eskaintza bat egitea delitutzat hartuta epaiketa goitik behera politikoa izan da 13 herritar horien kontra egin dena. Berriro ere Espainiako Auzitegi Nazionalak frogarik gabeko eta, are larriagoa dena, benetako deliturik gabeko epaiketa bat burutu du, lan politikoa egitea eta sufragio askerako eskubidea bera zigorbidean jarrita. Eskubide demokratikoen ikuspuntutik urraketa oso larriaren aurrean gaude beste behin ere. Epaiketa hau ilegalizazio politiken luzapena da, argi eta garbi. Euskal herritarren gehiengo zabal batek behin betiko gainditu nahi duen legez kanporatzeen politikaren eszenifikazio berri bat. Aro politiko berrian guztiz ulertezina gertatzen da euskal jendartearentzako eta nazioarteko komunitatearentzako Espainiako estatuak era honetako salbuespenezko epaiketekin jarraitzea.
Zentzu horretan, justizia egingo bada, absoluzioa izango da epai posible bakarra: 13 auzipetuak aske geratzea eta ilegalizazio politikoen makinaria judiziala behin betiko gelditzea eskatzen dugu. Argazkian, joan den ostiralean Erandion izandako eskualde manifestazioa / cc-by-sa Eleak.
|
|
Fiskaltzak zazpina urteko eskaera egin du Zubiaga, Rodrigo eta Urkaregirentzat
Igorlea: UKBERRI.NET - Data: Osteguna, 2012 Mai, 17 - 06:24 PM
45 Irakurketa
D3M eta Askatasunaren aurkako epaiketaren azken eguna izan da gaurkoa Espainiako Auzitegi Nazionalean. Akusazioak eta Defentsak balorazioa eta azken ondorioak azaldu behar zituen gaurko saioan eta fiskalak Fernando Antia eta Aitor Liguerzanaren aurkako akusazioa bertan behera utzi du eta jaitsi egin ditu gainerako hamaika lagunentzat eskatuta zituen zigorrak, Berria.info agerkariak zabaldu duenez. Bederatzi auzipeturentzat eskatutako zigorra bederatzi urtetik zazpira jaitsi du, tartean Eli Zubiaga algortarra, Iker Rodrigo lutxanarra eta Arantza Urkaregi Leioa eta Erandioko campuseko irakasle bilbotarra daudela. Horiei guztiei ETAko kide izatea leporatzen die fiskalak. Xabier Isasa eta Jose Antonio Munduate santutxuarren kasuan, berriz, zazpi urtetik bostera jaitsi du eskaera. Azken hauei ETAri laguntza eman izana leporatzen die Vicente Gonzalez Mota fiskalak. Argazkian, apirilaren 14ean Algortan izandako agerraldi jendetsua.
|
|
Mikel Antzaren "Bakarmortuko kronikak" liburua aurkeztuko dute bihar Larrabasterran
Igorlea: UKBERRI.NET - Data: Osteguna, 2012 Mai, 17 - 12:39 PM
67 Irakurketa
Mikel Antza preso politiko donostiarrak espetxean idatzitako "Bakarmortuko kronikak" liburuaren aurkezpena izango da ostiral honetan, hilak 18, Plaza Beltza herri kultur-gunean. Hitzordua 19:00etan jarri dute Larrabasterrako Akilino Arriola kaleko lokalean. Besteak beste, Mitxel Sarasketa, Oier Gonzalez eta Zorion Zamakola preso ohiek hitza hartuko dute. Mikel Antza 2004an atxilotu zuten bere emazte Marixol Iparragirrerekin eta semearekin zegoela Bearnon. Segidan Estatu frantseseko kartzela batera eraman eta bakartze moduluan eduki zuten lau hilabetez. Egoera berri eta latz horretan zegoela, bizirik jarraitzeko modu bakarra idazten hastea zela ohartu zen Antza eta halaxe idatzi zituen "Bakarmortuko kronikak" liburuan bildu diren testuak. Testuak 2004. eta 2005. urteen artean idatzi zituen Antzak, koaderno batzuetan. Idazki horiek Ataramiñe argitaletxe eta kultur elkarteak jaso zituen familiakideen eskuetatik, eta jaso zituzten bezala kaleratu zituzten, zuzenketa ortografikoak bakarrik eginez. Argazkian, Mikel Antzaren eskuliburua / cc-by Ataramiñe.
|
|
Homofobiaren kontrako adierazpenarekin bat egin du Getxoko Udalak
Igorlea: UKBERRI.NET - Data: Osteguna, 2012 Mai, 17 - 12:00 PM
80 Irakurketa
Getxoko Udalak, Bozeramaleen Batzordeak aho batez onartuta, bat egin du Bizkaiko Foru Aldundiak sexu askatasunari eta sexu dibertsitateari buruz kaleratutako manifestuarekin, gaur, maiatzaren 17an, ospatzen den Homofobia, Lesbofobia eta Transfobiaren aurkako Eguna dela eta. Manifestuaren arabera, Getxoko Udalak konpromisoa hartzen du honako hauetarako: herritar guztiak errespetatzeko, haien orientazio sexuala eta genero-identitatea edozein dela ere; pertsonen duintasuna eta osotasun fisikoa errespetatzeko eta adierazpen homofoboak, lesbofoboak eta transfoboak kondenatzeko; mundu osoan erabat despenalizatzea eskatzeko eta transexualitatea despatologizatzeko eta psikiatriako eskuliburuetatik kentzeko; espazio publikoan eta bereziki kirol arloan (aurten alor horretan zentratu baita kanpaina) egindako adierazpen afektibo-sexualen eta genero-identitateen ikusgarritasuna errespetatzeko; lanerako, kirola egiteko eta aisialdirako guneak erabiltzeko eskubidea bermatzeko; komunikabideetan, agerraldi kulturaletan, sozialetan, artistikoetan eta abarretan aukera sexual eta genero-identitate bakoitzaren irudi duina sustatzeko; gizarte anitzago, irekiago eta integratzaileago baten alde lan egiteko, eta sexualitate anitzerako bide egiteko eta sexualitate askearen-aukera eta orientazio sexualerako eta genero-identitaterako askatasuna barne-aurkako jokabide guztien kontra egiteko. Argazkia: cc-by-nc Erprofe.
|
|
Getxoko Bildu: "euskararen etorkizunaz, Getxotik"
Igorlea: UKBERRI.NET - Data: Osteguna, 2012 Mai, 17 - 10:45 AM
121 Irakurketa
Aurkezpen astea izan zen maiatzeko lehena Getxon. EAJren Gobernu Taldearen 2012-2015 Legegintzaldi Planaren inguruan aritu ginen gure azken ohar publikoan. Oraingo honetan, hilaren 3an Areetako Andres Isasi Musika Eskolan aurkeztutako Euskara Biziberritzeko III. Planaren aurkezpenaz arituko gara. Bai, Planaren aurkezpenaz arituko gara, ez dugu planean sakonduko. Alde batetik, ezin dugulako, 2011n II. Plana agortu bazen ere, ez dutelako III.a aurkeztu; bestetik, Getxoko Udalak antolatu zuen aurkezpenaren inguruan hausnartzea beharrezkoa ikusten dugulako. Musika Eskolako areto nagusia, diseinu txukunez egindako liburuxka eta material pila, pantaila erraldoia urrutiko agintez kontrolatuta, aurkezlea…edozein ekitaldi garrantzitsuk behar duen guztia bazegoen Areetan. Egunak merezi zuen; Alkateak argi utzi bezala, euskarak ere plan estrategikoa premiazkoa du Getxon. Baina, arrastiko izarra izan behar zuen gure hizkuntza zaharrak, izar mediatikoago baten argiagatik itsutua izan zen: Juan Jose Ibarretxe Markoartu jauna. Euskarak Getxon duen etorkizunaren inguruan sakontzera joan ginenok, zalantzaz beterik bueltatu ginen etxera: “zein izan da aurreko planaren asebetetze maila”, “D ereduaren aldeko lanketarik egingo da plan berrian”, “kirol arloan zein neurri hartuko da euskalduntzea bermatzeko”? Horren ordez, gehiegi sakondu gabe alkateak aurkeztutako datu estatistiko batzuekin eta Ibarretxeren “speech”arekin aurkitu ginen. Argazkian, Getxoko Bilduko lau zinegotziak prentsaurreko bat ematen.
|
|
Umore Azokako 47 antzezlanetatik "euskaraz bost bakarrik" direla salatu du Berbalamiñek
Igorlea: UKBERRI.NET - Data: Osteguna, 2012 Mai, 17 - 10:18 AM
65 Irakurketa
Gaur hasi eta igandera bitartean, 47 antzezlan ekarriko ditu Leioara Umore Azokaren 13. edizioak. Bada, guzti horietatik "euskaraz bost bakarrik" direla salatu du Berbalamiñe euskara elkarteak. Euskaltzaleek azaldu dutenez, badira urte batzuk Umore Azoka egiten dela herrian eta oraindik Udalak "ez du antzerkien erdia ere euskaraz eskaini". "Zenbat denbora itxaron behar dugu antzerkiak euskaraz ikusteko? Hori ote da Leioako Udalak duen plana euskararen normalizazioaren bidean? Zergatik ez du Udalak euskarazko antzerki gehiagorik eskaintzen Umore Azokan? Leioako euskaldunok gure herrian euskaraz bizi nahi dugu eta egunero ahalegin horretan lanean dihardugu. Horregatik, Umore Azokan ere antzerkia euskaraz ikusi nahi dugu, eta zuk?", adierazi dute Berbalamiñekoek. Argazkian, aurtengo Umore Azokak taularatuko duen ikuskizunetako bat / © Umore Azoka.
|
|
Astelehenetik aurrera udalekuetan izena emateko aukera izango dute Bizarra Lepoaneko bazkideek
Igorlea: UKBERRI.NET - Data: Osteguna, 2012 Mai, 17 - 09:21 AM
59 Irakurketa
2012ko Udaleku irekietan izena emateko epea astelehenean zabalduko du Bizarra Lepoan Getxo udalerriko euskara elkarteak. Bazkideek aukera izango dute maiatzaren 21etik 24ra (biak barne) izena emateko eta bazkide ez direnek maiatzaren 28tik 31ra (biak barne). Egunero, goizeko 10:00etatik 13:30ak arte eta astearte eta ostegunetan ere 17:00etatik 18:30ak arte. Ez da onartuko ordutegi honetatik kanpo ekartzen den orririk, azaldu dutenez. Izen ematea ezin izango da ez telefonoz, ez postaz egin; diru-sarreraren ziurtagiriarekin (EK 3035 0108 06 1081032766) eta Osakidetzako txartelaren fotokopiarekin batera bulegora agertu eta bertan izen emate orria bete beharko da. Beti bezala prezio ezberdinak egongo dira: lehenengo txandan (ekainaren 25etik 29ra), 40 euro bazkideek, 55 euro bazkide ez direnek, eta 20 euro Getxon gutxieneko errenta jasotzen dutenek. Eta bigarren (uztailaren 2tik 13ra) eta hirugarren txandetan (uztailaren 16tik 27ra), 80 euro bazkideek, 110 euro bazkide ez direnek, eta 20 euro Getxon gutxieneko errenta jasotzen dutenek. Argazkian, Bapirukeko umeak skate ikastaro batean.
|
|
Zabalik dago Iñaki Saez udako futbol topaketetan izena emateko epea
Igorlea: UKBERRI.NET - Data: Osteguna, 2012 Mai, 17 - 09:05 AM
47 Irakurketa
Urtero legez, 5 eta 14 urte arteko neska-mutilei zuzendutako Iñaki Saez udako futbol topaketak antolatu ditu Leioa Kirol Elkarteak. Bertan, futbolari gazteek euren jokoa hobetzeko eta kirol horren inguruko hainbat ariketa egiteko aukera izango dute, beti ere euskara ardatza izanik. Parte hartzaileak hiru taldeetan banatuta egongo dira: lehenengoak ekainaren 25tik 29ra arte izango ditu topaketak; bigarrenak uztailaren 2tik 6ra arte; eta azkenak uztailaren 9tik 13ra. Ordutegia goizekoa izango da, astelehenetik ostiralera, 9:00etatik 14:00etara. Antolatzaileek jakinarazi dutenez hainbat zonaldetatik abiatuko den autobus zerbitzua ere egongo da, hala nola, Uribe Kosta, Txorierri, Ezkerraldea eta Bilbotik. Topaketen helburu nagusiak ondokoak dira: jokoaren interpretazioa hobetzea, gaitasun taktikoak eta teknikoak hobetzea, eta euskararen erabilera sustatzea, besteak beste. Bertan parte hartzeko, campusleioa[abildua]yahoo.es helbide elektronikora bidal daiteke mezua edo 675 533 528 telefono zenbakira deitu. Argazkian, Javi Martinez Athleticeko jokalaria iaz topaketetan parte hartu zuten neska-mutilekin / © Leioa.net.
|
|
Leioako Umore Azokak aurtengo edizioari ekingo dio bihar bederatzi estreinaldirekin
Igorlea: UKBERRI.NET - Data: Asteazkena, 2012 Mai, 16 - 05:25 PM
60 Irakurketa
Leioako kale eta plazak eszenatoki erraldoia bilakatuko dira ostegunetik igandera bitartean. Umore Azokaren 13. edizioan 47 ikuskizun desberdin eskainiko dituzte 45 antzerki taldek, horien artean 22 estreinaldi izango direla. Orotara, 120 emanaldi hartuko ditu Leioak. Horiek guztiak ahalbidetzeko hainbat trafiko aldaketa iragarri ditu Udalak. Horrenbestez, Umore Azokaren lehenengo egunean 9 ikuskizun izango dira eta horietako hiruk antolatzaileek ekoizpenerako emandako laguntza jaso dute: Malas Compañiasen "Orsai", ATX Teatroren "Gnosia" eta Matrioskaren "Motel Matrioska", hain zuzen. "Orsai" eszenaratzen duten hiru pertsonaiak, oreka galtzear daude askatasuna eta eromenaren artean dagoen lerro mehean. "Gnosia", berriz, boterearen zentzugabekeria, menpean mantso jartzeko joera, eta ezinbesteko iraultzaren gaineko ikuskizun ziklikoa da, non istorioa behin eta berriz errepikatzen den. Eta "Motel Matrioska" obrak, azkenik, bide bazterrean zaharkituta dagoen hotelean kokatzen du istorioa eta ostalariak gerturatzen ez badira ere, kobratzaileak ikasi du bertarako bidea. Argazkian, Malas Compañías taldearen "Orsai" antzezlana / © Umore Azoka.
|
|
Museoen eguna ospatuko dute ostiralean campusean
Igorlea: UKBERRI.NET - Data: Asteazkena, 2012 Mai, 16 - 01:32 PM
79 Irakurketa
Ostiralean, hilak 18, Museoen Nazioarteko Eguna izango da. Hori ospatu nahian, Leioa eta Erandioko campuseko Liburutegi Nagusian dagoen EHUko Medikuntza eta Zientzia Historiaren Euskal Museoak bisita gidatua antolatu du. Goizeko 11etan, Anton Erkoreka zentroko zuzendariaren eskutik, museoaren erakusketa iraunkorra osatzen duten aretoak ikusi ahal izango dira, eta baita joan zen martxoan ireki eta ostiral honetan bertan bere atea itxiko dituen “Brujeria e inquisicion” aldi baterako erakusketa ere. Bisitan parte hartu nahi izanez gero ezinbestekoa da izena ematea 946 012 790 telefono zenbakira deituta. Medikuntza eta Zientzia Historiaren Museoa Josee Luis Gotik sortu zuen orain 30 urte, XIX eta XX. mendeko objektu mediku eta zientifiko bilduma aberatsa biltzeko. Argazkian, museoaren irudi bat / © EHU.
|
|
Sopelako Udala: "Sexu eta aniztasun askatasunaren aldeko manifestu instituzionala"
Igorlea: UKBERRI.NET - Data: Asteazkena, 2012 Mai, 16 - 09:28 AM
80 Irakurketa
2012ko maiatzaren 17an Homofobia, Lesbofobia eta Transfobiaren aurkako Eguna ospatzen dugu. Sopelako Udalak ahobatez berretsi gura du orientazio-sexuala eta genero-identitatean oinarritutako diskriminazioaren aurkako borrokan duen konpromisoa. Izan ere, diskriminazio horren funtsean aurreiritziak eta ezjakintasuna baitaude, eta hori berdintasun printzipioaren aurkakoa baita –printzipio horren arabera, pertsona guztiak berdinak gara eta eskubide berberak ditugu, gure orientazio sexuala edo genero-identitatea edozein dela ere–. Egia da azken urteetan aurrerapauso handiak lortu dituela LGTB taldeak mendebaldeko herrialde asko eta askotan, berdindu egin baitira zenbait lege eta eskubide. Dena dela, oraindik ere badago zer lortu gizartean, esaterako, orientazio sexualaren eta genero identitatearen ondorioz sortutako indarkeria, munduko hainbat herrialdetan eragiten diena lesbiana, gay, transexual, bisexual, eta transgenero pertsonei. Argazkia: cc-by-nc Erprofe.
|
|
Gunea Eguna izango da larunbatean Azkoitian
Igorlea: UKBERRI.NET - Data: Asteazkena, 2012 Mai, 16 - 09:05 AM
78 Irakurketa
Lehendabiziko Gunea Eguna ospatuko da larunbat honetan, maiatzak 19, Azkoitian, Topagunea Euskara Elkarteen Federazioak antolatuta. Egitarau zabala prestatu dute egun horretarako, goiz eta arratsalderako. Euskaldunon elkarteetako kideen artean esperientziak trukatzea da eguneko zutabe nagusia eta egitarauaren zati handi bat hartuko du horrek. "Topo eta topa egiteko eguna izango da. Euskaldunon elkarteen mugimenduko lagunok batu, batzuk besteengandik ikasi eta guztion artean lortzen ari garena ospatzeko eguna", azaldu dutenez. Besteak beste, orain urtebete, UKBERRI.NET argitaratzen duen Ukberri Uribe Kostako Komunikabide Euskaldunak elkartea Topaguneko bazkide bihurtu da, gainontzeko elkarteek aho batez onartuta batzar nagusian. Horrela, jada dozena erdi dira Topagunean parte hartzen duten Uribe Kosta eta Erandioko euskaldunen elkarteak: Berbalamiñe, Berbots, Bizarra Lepoan, Boluntzarreta, Egizu eta Ukberri. Argazkian, aipatu batzar orokorrean Rozio Luces Egizu Getxo Euskaldun! elkarteko dinamizatzailea Topaguneko Zuzendaritza Batzordeko kide aukeratu zuten.
|
|
Metro Bilbaoko gatazkari buruz arituko dira gaur Eztabaidan
Igorlea: UKBERRI.NET - Data: Asteazkena, 2012 Mai, 16 - 08:33 AM
88 Irakurketa
Metro Bilbao garraio enpresako lan gatazkari buruzko hitzaldia antolatu du gaurko Eztabaida gune antiatoritarioak. Solasaldia hiriarteko treneko greba batzordeko kideek eskaini dute, 19:30etik aurrera, Algortako Villamonte plazako A4 zenbakian dagoen lokalean. Metro Bilbaoko zuzendaritzak 2011ko uztailaren 11ko akordioan adostutakoa bete ez zuelakoan, azaroan ekin zieten berriro lanuzteei sindikatu guztiek, CCOOk izan ezik. Aipatu hitzarmenak itxi zuen ekainean eta uztailean 8 egunetan lanuzteak eragin zituen auzia. Gatazkaren egungo egoerari dagokionez, ebazpen judizialak tartean, Lan Harremanen Kontseiluan sortutako elkarrizketa-mahaiaren batzarrak jarraitu artean mobilizaziorik egingo ez zutela jakinarazi zuten maiatzaren 3an ELA, CIM, UGT, LAB eta ESK sindikatuek. Argazkian, metroko langileek egindako mobilizazioetariko bat / © LAB Metro Bilbao.
|
|
| |
|
|
