|
|
 |
Blues musikak hartuko du bihar Leioako San Bartolome auzoa
Igorlea: UKBERRI.NET - Data: Ostirala, 2008 Mai, 09 - 06:41 PM
5 Irakurketa
Auzotarrok kultur Elkarteak antolatuta, bihar Leioa Sanbar Blues Jailadiaren laugarren edizioa egingo da San Bartolomeko Telleria plazan. Hori ospatzeko gurean hainbat kontzertu eta txorizo dastaketa izango da. Jaialdia arratsaldeko 5etan hasiko da txorizo dastaketarekin eta 21:00etatik aurrera musikari egingo zaio lekua, Mike Hammer & The Taxi Drivers laukote barakaldarrak, Valladolideko Bluedays Blues Band-ek eta bere bigarren diskoa aurkeztuko duen Travellin' Brothers boskoteak (argazkian) oholtzaren gainetik abestuko dutela. Barakaldoztarrek 2006an osatu zuten taldea eta dagoeneko eskarmentu handia dute blues jaialdietan, musika hori jazz eta rockarekin uztartzen dutela.
|
|
Langraitzera egingo dute martxa igandean
Igorlea: UKBERRI.NET - Data: Ostirala, 2008 Mai, 09 - 06:33 PM
4 Irakurketa
Anjel Figueroa algortarra, Jon Agirre aramaioarra, Josu Uribetxebarria arrasatearra eta bertan dituzten gainontzeko preso gaixoen askatasuna aldarrikatzeko asmoz, Langraitzeko espetxera egingo da martxa igande honetan, maiatzak 11. Horrenbestez, etzirako 12:00etan jarri dute hitzordua Gasteiz aldeko Lopidana zerbitzugunean, espetxera 12:30ak aldera heltzeko. Arrasatetik 10:30ean abiatuko da autobusa eta ordu laurden beranduago hartuko ditu aramaioarrak. Algortatik, berriz, 10:45ean irtengo da Kirikińotik, nahiz eta hasieran 11:00etan Villamontetik izango zela iragarri arren (izena emateko Amnistia tabernan). Horretaz gain, Bilbo, Donostia eta Gasteiz bertatik ere joango da jendea. Izan ere, Anjel kalera! herri ekimenak; Amnistiaren Aldeko Mugimenduak; Etxeratek; Gizabanakoen eta Gizarte Eskubideen Babeserako Elkarteak; Gasteiz, Bilbo eta Gipuzkoako Anarkista eta Autonomo Solidarioek; Salhaketak; eta Anjel Figueroa (Algorta), Jon Agirre (Aramaio) eta Josu Uribetxebarriaren (Arrasate) senide, lagun eta herrikideek bat egin dute ekimenarekin.
|
|
Ipar Uribeko VII. Bertsolari Txapelketako finalistak Fikan erabakiko dira iluntzean
Igorlea: UKBERRI.NET - Data: Ostirala, 2008 Mai, 09 - 05:47 PM
4 Irakurketa
Gaur iluntzeko 8etan jokatuko da Ipar Uribeko VII. Bertsolari Txapelketako hirugarren eta azken kanporaketa, Fikako herriko txokoan, bertso afariaren bidez. Bertan, sei bertsolariek jardungo dute: ALBEko Ekaitz Larrazabal "Katxo", Josu Landeta eta Pello Etxebarria "Bonbero", Itzubaltzetako Pello Ruiz de Agirre eta Taketeko Miren Ibarluzea eta Mikel Goiriena. Miren Ibarluzea eta "Katxo" faboritoak badira ere, kanporaketan beste norbait nagusitzea ezin da baztertu. Argi dagoena da, txapelketan aurrera egiteko Fikako kanporaketakoak beren burua estutu beharko dutela eta Larrabetzun eta Sopelan aritu zutenak baino hobeto egin beharko dutela. Lortu ala ez, finala berdin egingo da maiatzaren 17an Areetako Andres Isasi musika eskolan, 18:00etan. Momentuz, eta Fikako emaitzaren zain, Jone Uria, Peru Vidal, Itxaso Paya, Olatz Ibarluzea, Arrate Illaro eta Miren Loizaga daude sailkapen postuetan.
|
|
Leioako VIII. Pop-Rock lehiaketaren finalak jokatuko dira gaur gauean eta bihar
Igorlea: UKBERRI.NET - Data: Ostirala, 2008 Mai, 09 - 02:13 PM
15 Irakurketa
Gaur, ostirala, eta larunbatean izango dira aurtengo Leioako VIII. Pop-Rock lehiaketaren finalak. Edizio honetan 116 musika taldek, tartean 11 talde leioaztar, aurkeztu dituzte beren lanak. Kanpoko parte hartze handiari buruz, "gure herriko mugak irekita egon dira, gure partaide zerrendara jatorri ezberdinak gehituz", adierazi dute antolatzaileek. Urtero legez modalitate ezberdin bi egon dira, 38 metal talde eta 78 pop-rock talde aurkeztu direla. Leioaztarrei dagokienez, gehiengoak, 9, pop-rockera bideratu da. Finala gaur eta bihar 21:30tik aurrera Aldapa auditorioan jokatuko bada ere, dagoeneko bi sari iragarri eta eman ditu antolakuntzak: Euskara Saria, Etxebarriko Niketz metal taldeko "Irakurri ezinezko hitzak" abestiari emana eta Leioako talderik onenari, kasu horretan Nasti de Plasti taldeak eskuratu duela. Argazkian, leioztarrak pasa den apirilaren 26an Barakaldoko Edaska aretoan emandako kontzertuan / Nasti de Plasti.
|
|
Neska gazte bat bortxatu egin dute Getxon
Igorlea: UKBERRI.NET - Data: Ostirala, 2008 Mai, 09 - 01:33 PM
33 Irakurketa
Getxoko neska gazte batek bortxaketa pairatu izana salatu egin du, eta hortaz "kasua egon badago", baieztatu diote UKBERRI.NETi Ertzaintzaren Prentsa Bulegoko langileek. Izan ere, azken egunotan bolo-bolo ibili da Getxon bertako neskato bat bortxatu dutela eta horren berri eman diote agerkari digital honi hainbat irakurlek. Baina, aipatutako deklarazio xumeaz landa Ertzaintzak nahiago izan du kasuaren inguruko daturik ez ematea, "kontu handiz ibiltzeko gaia delako" eta oraingoz ikerketa bere hastapenetan baino ez delako. Mugimendu feministako kideek aitortu dutenez, "egoera larria da, aspaldi honetan Algortan horrelako hainbat ekintza nazkagarri gertatu baitira eta azkenean, bortxaketa bat". Argazkian, azaroaren 25ean, Algortako Bilgune Feministak deituta, emakumeen aurkako indarkeriaren kontra egindako elkarretaratzea.
|
|
ETA: "1978an bezala, 'ez' esaten diogu itun autonomiko berri bat inposatzeari"
Igorlea: UKBERRI.NET - Data: Ostirala, 2008 Mai, 09 - 12:16 PM
11 Irakurketa
Euskadi Ta Askatasunak (ETA) lau atentatu bere gain hartu eta "Moncloako estatutua berritzeko" saiakeren aurrean kokatuko dela esan du zabaldutako testuan. Izan ere, ETA (m)-k komunikatu bat helarazi dio gaur goizean "Gara" egunkariari eta bertan kalte materialak sortu zituzten lau atentatu erreibindikatu ditu: Azpeitiako eta Lapoblaciongo telebista hedagailu banaren aurkakoak, martxoaren 30ean eta apirilaren 12an; eta PSE-EEko egoitzen aurka Abusun eta Elgoibarren apirilaren 17an eta 20an. Horretaz gain, ETAk PSOE eta EAJren azken ekimenetan "gure herriari itun autonomiko berri bat inposatzeko" zantzuak ikusi dituela dio, eta horrek "Euskal Herriaren asimilazioan sakontzea besterik" ekarriko ez lukeelakoan, "Euskal Herriaren askatasun osoa nahi dugunok 78an Espainiako Konstituzioari ez! esan genion bezala, egun ere ez! esaten diogu" dio ETAk.
|
|
Dozenaka lagunek "salbuespen egoerarekin" amaitzea aldarrikatu dute eskualdean
Igorlea: UKBERRI.NET - Data: Osteguna, 2008 Mai, 08 - 09:58 PM
35 Irakurketa
Dozenaka eta dozenaka uribekostar kaleratu dira arratsaldean "salbuespen egoerari stop" lelopeko elkarretaratzeak egiteko. Euripean, auzokideek bere sostengua agertu diote Inocencia Galparsoro EAEko alkate arrasatearrari eta PSOE alderdiari leporatu diote kartzelan sartzearen erabakia. Ekimen hori, "proiektu independentistarekin amaitzeko egin duen hautuaren abitan" eginiko "jauzi kualitatibo" gisa azaldu dute, gainera. Era berean, EAJren eta Ertzaintzaren bizkar gainean jarri dute ezker abertzalea desegiten saiatzen PSOEri lagundu izana, mozio etikoekin, besteak beste. Bestalde, Hego Euskal Herrirako autonomia erabakitzailearen proposamena gizarteratzeko prozesua ekiditea dela ekimen horien helburu salatu dute, baita "eraso hauek guztiauek ez gaituztela ezta milimetro bakar bat ere gure bide politikotik mugiaraziko" iragarri ere. Antolatzaileen arabera, 75 lagun batu dira Algortan, 50 Erandion, 45 Leioan, 40 Areetan, 37 Plentzian eta 20 Sopelan, besteak beste. Goizean, beste 200 bat lagun batu dira campusean, Sopelan eta Itzubaltzeta / Romon.
|
|
Anjel Figueroa askatzeko 3.582 sinadura zuzendu dizkiete Landa, Ibarretxe eta Langraitzeko zuzendariari
Igorlea: UKBERRI.NET - Data: Osteguna, 2008 Mai, 08 - 09:40 PM
22 Irakurketa
Eusko Jaurlaritzako Lehendakaritzara eta Langraitzeko espetxera egindako bisitan, herritarrek emandako 3.582 sinadura zuzendu dizkie gaur Juan Jose Ibarretxe Araba, Bizkaia eta Gipuzkoako lehendakariari eta Juan Antonio Perez kartzeleko zuzendariari, Anjel kalera! herri ekimenak. Goizean bezala, Mari Karmen Fernandez Figueroaren ama buru zela, beste horrenbeste egin zuten joandako apirilaren 25ean Getxoko udaletxeko erregistroan, orduan Imanol Landa alkateari zuzenduz. Sinadurei atxikitako gutunean, preso gaixo algortarra askatzeko aldarria bere egin dezatela eta, horretarako, eskura dituzten baliabide guztiak erabil ditzatela eskatu zaie hiruei. Bitartean, Algortan autobusa antolatu dute igande honetan, maiatzak 11, Langraitzeko espetxera egingo den martxara joateko. Horrenbestez, 11:00etan abiatuko da Villamontetik (Izen-ematea Amnistia tabernan). Argazkian, sinadurak Getxoko udaletxean entregatzen.
|
|
Bihar 33/01 auziari buruz jardungo dute Berangon
Igorlea: UKBERRI.NET - Data: Osteguna, 2008 Mai, 08 - 08:41 PM
22 Irakurketa
Etxerat, Askatasuna, Senideak, Amnistiaren Aldeko Batzordeak edo Euskal Herriko Giza Eskubideen Behatokia erakundeetan lan egiteagatik 27 euskal herritarrei egiten ari zaizkion epaiketa dela eta, hitzaldia izango da ostiral honetan, maiatzak 9, Berangoko kultur etxean. 19:30ean abiatuko den saioan, 33/01ean auziperatutako Uribe Kostako bi lagunek, Mitxel Sarasketa getxoztarrak eta Jagoba Terrones berangoztarrak, hartuko dute hitza. Hilaren 15ean, berriz, Algortako Aldai kulturgunean (Itsasgane) egingo dute solasaldia, ordu berean. Horretan, Juan Antonio Madariaga edukiko du lagun Sarasketak. Bitartean, epaiketak aurrera darrai Madrilen. Argazkian, joan den asteazkenean, Leioa eta Erandioko campusean egindako elkarretaratzea.
|
|
Leioako campuserako autobusek greba egingo dute bihar
Igorlea: UKBERRI.NET - Data: Osteguna, 2008 Mai, 08 - 08:22 PM
24 Irakurketa
Emaitzik gabeko negoziaketen ostean, greba deialdiari eutsiko diote ostiral honetan, maiatzak 9, Bilbobus eta Bizkaibuseko gidariek. Lanuzteak Transportes Colectivos SA (TCSA) enpresaren jardunpeko lineetan izango du eragina, hau da, Ezkerraldea eta Nerbioi Garaia eskualdeetara doazenetan eta Bilbotik, Nerbioi Garaitik eta Eskuinaldetik EHUra doazenetan. Uribe Kosta eta Erandiori dagokionez, Areeta, Getxo, Algorta eta Altzagatik Leioa eta Erandioko campuserako autobusik ez da egongo, 7:30etik 9:30era eta 18:20etik 20:00etara; gutxieneko zerbitzuak kontutan hartu gabe noski. Bilbotik etorrita, Astrabudua zein Erandio Landatik EHUrako bidea egiten duten lineetan ere izango dute eragina lanuzteek. Baita Astrabuduatik Erandio Landa eta Sondikarako autobusetan ere. Hileko astelehen eta ostiral guztietarako egin du greba deialdia TCSAko enpresa–batzordeak.
|
|
| |
|
|
